لو أنت خريج جديد من كلية التمريض ومحتار ازاي هتنضم لنقابة التمريض وايه الأوراق المطلوبة علشان مش تتعب نفسك وتروح اكتر من مشوار للنقابة وترجع لأن أوراقك مش كامله يبقي خليك معايا في المقالة ديه وهتعرف كل حاجة بالتفصيل إن شاء الله.
أولاً ألف مبروك على التخرج ( يعني لو حد مش قالك كده لو جايب مقبول 🤣 طبعا بهزر ).
بعد لما تخلص امتيازك والحمد لله شهادة التخرج وشهادة الامتياز يطلعوا علي خير ( وهتعرف ده بعدين 🤣) هتطلب من الكلية ٤ نسخ من كل شهادة غير اللي بتطلعلك من الكلية ( وهتعرف ليه بعدين ).
لما الشهادات اللي طلبتها تطلع هتصور شهادة التخرج وشهادة الامتياز كم صورة ( كتر علي قد ما تقدر 🤣 علشان هتحتاج نسخ كتيير)
لو أنت ولد لازم تطلع موقف تجنيد من منطقة التجنيد اللي انت تابع ليها وتطلب منهم حاجة اسمها (لمن يهمه الأمر من سكرتارية التجنيد)( ولازم يكون معاك ساعتها صورة بطاقة وصورة شهادة ميلاد وصورة شهادة تخرج وصورة شهادة الامتياز) ( وديه البداية 🤣 عرفت ليه هتحتاج صور كتيير )
بعد كده هتطلع بالورق اللي معاك علي نقابة التمريض الفرعية اللي في محافظة سكنك يعني لو أنت من الشرقية وبطاقتك الإسماعيلية يبقي هتروح الإسماعيلية 🤣
ايه بقى الأوراق اللي هاخدها معايا علشان مش ارجع وانجز في يومي:-
١- شهادة تخرج وشهادة امتياز وصور ليهم ( كتيير برضوا 🤣)
٢- صورة بطاقة وصورة شهادة ميلاد ( احتياطي🤣 )( والصور كتيير برضوا 🤣)
٣- موقف التجنيد بالنسبه للولاد ( لمن يهمه الأمر اللي عملته من منطقة التجنيد، فاكر ولا هتضيعنا 🤣) ( ومش تنسى تصوره كتيير برضوا 🤣)
٤- ملف ورق من اي مكتبة ( الكبير ده اللي شبه بتاع القواضي اللي مع المحامين 🤣)
٥- فيش جنائي موجه للنقابة العامة للتمريض ( وده هتطلعه من السجل المدني ) ( يمكن يطلع عليك قضية هيكون ارحم من الانضمام لنقاية التمريض 🤣 )
٦- قسيمة الزواج بالنسبة للمتزوجين. ( دا لو مجوز ولو مش مجوز يبقي قابلني لو اتجوزت 🤣 )
٧- شوية صور شخصية ( بيقولوا ٢ بس خلي معاك اكتر احتياطي) ( اهم حاجة ودانك تكون ظاهره 🤣 بهزر يا عم)
٨- شهادة الثانوية العامة او شهادة مدرسة التمريض لو انت مش خريج ثانوي عام ( هتاخد شهادة الثانوية من الكليه لما تتخرج مش تقلق 🤣)
ملحوظة مهمة جدا:- لو انت لا قدر الله سقط سنة في الكلية او كنت محول من كلية تانيه لكلية التمريض بس قضيت سنة مثلا في الكلية التانيه او كنت مريض ودخلت الكلية متأخر بعد الثانوية.
بمعني آخر فيه فجوة بين دخولك الكلية والثانوية او مش اتخرجت مع دفعتك يبقي لازم تاخد معاك ما يثبت ذلك. لو انت سقط مثلا يبقي خد معاك من الكلية بيان حالة انك كنت ساقط سنه لو انت كنت محول من كليه تانيه خد جواب التحويل معاك وهكذا ( من الآخر النقابة عايزه تعرف كل تفاصيل حياتك 🤣)
هتاخد كل الأوراق اللي فوق وهتطلع علي النقابة الفرعية وهتسلمهم الورق ده، وهيقولوا ليك هنبعت ورقك للنقابة العامة في القاهرة ولما يوافقوا هنتصل عليك ( اوعي تصدقهم يبقي روح اسأل علي ورقك بعد ١٠ أيام مثلا 🤣)
ولما تجيلك الموافقة والنقابة العامة تقبلوا، يبقي هتدفع في النقابة الفرعية ( ٥٣٠٠ جنية ) ده في سنة ٢٠٢٥ ممكن يزيد بعدين الله اعلم.
وهتاخد وصل بالمبلغ ده ويبقي فاضل ليك استخراج مزاولة المهنة والموضوع ده هنتكلم عنه في مقالة تانيه إن شاء الله
والوصل مهم جدا اوعي تضيعه علشان هتحتاجه في ورق المزاولة وكذلك لما تستلم كارنيه النقابة.
شوية اسئلة علي السريع:-
هو انا لازم انضم للنقابة؟ للأسف لازم علشان تطلع مزاولة المهنة واللي هتفيدك في شغلك وكمان في السفر
هو الموضوع ده بيأخد وقت كتيير؟ تقريباً شهر
هل هصرف كتيير؟ يعني بمواصلاتك بتمن الشهادات والتصوير حوالي من ٨ إلي ١٠ آلاف 🤣( بتوجع معلش)
تعليق واحد