اتكلمنا في مقالة سابقة عن كيفية الانضمام إلي نقابة التمريض وقولنا أن الانضمام للنقابة جزء مهم علشان تقدر تطلع كارنيه مزاولة مهنة التمريض.
لو عايز تشوف المقالة السابقة اضغط هنا
وقولتكم لازم تحتفظوا بالوصل اللي دفعتم بيه ٥٣٠٠ في النقابة الفرعية.
دلوقتي هنتعرف علي الأوراق المطلوبة علشان تتقيد في سجل أخصائيين التمريض في وزراة الصحة
ركز معايا وجهز الورق اللي هقولك عليه:-
١- شهادة التخرج وشهادة امتياز أصلية
٢- فيش جنائي موجه إلي وزارة الصحة
٣- صور شخصية باللبس الأبيض وكاب أبيض بالنسبه للولاد والطرحة البيضة بالنسبه للبنات ( طلي بالأبيض 😂 ) ولو مش عارفين تعملوها هتلاقوا فيه مكان تصوير عند وزارة الصحة هيعملها من اي صوره ليك علي الموبيل ( مش تقلقوا 😂 )
٤- وصل الدفع من النقابة الفرعية
٥- صورة من امتحان مزاولة المهنة ( اسكرين شوت )
٦- صورة بطاقة شخصية
٧- قسيمة جواز بالنسبه للمتجوزين
وكمان فيه شوية ورق هتاخده من النقابة الفرعية للوزارة هما هيقولولك علي، بعد كده هتطلع علي وزارة الصحة في القاهرة علشان تقدملهم الورق ده كله وتطلع مزاولة المهنة.
خلي بالك لازم تكون في الوزارة من بدري علشان الخزنة بتقفل الساعة ١٢ 😂 ( اصحى ليخفلونا ) وخد معاك تقريباً ٨٠٠ جنية كاش وزيهم فيزا علشان انت مش عارف هتدفع كاش ولا فيزا 😂 وكمان ١٠ فكه ( مش تسأل ليه هتعرف هناك 😂)
مكان وزارة الصحة؟👇👇
موجوده في سعد زغلول يعني تقدر تركب المترو من اي مكان وتنزل محطة سعد زغلول وهتتمشي شوية هتلاقي الوزارة
هتقدم الورق وهتدفع الفلوس وهتستني تقريباً ساعتين وهتاخد المزاولة بتاعتك ( تقريباً هتاخد ٧ نسخ ) بعد كده هتطلع علي النقابة العامة للتمريض الموجوده في المنيل ممكن تركب ميكروباص من عند وزراة الصحة وهينزلك عندها او خد توكتوك ( هو انت فقير 🤣).
هتسلم في النقابة نسخة من مزاولة المهنة وهترجع بيتك ( سالماً غانماً 😂) وتاني يوم او اي يوم يريحك هتطلع علي النقابة الفرعية في المحافظة بتاعتك هتسلمهم نسختين من المزاولة والباقي خليه علشانك 😂
وكده انت عملت الصح وزيادة هتستني شهر او اقل والنقابة الفرعية هيتصلوا عليك علشان تحضر محاضره وتستلم كارنية النقابة ومبروك عليك يا عم الناس ويا ست البنات
